Prosiectau'r Llywydd

PROSIECT BETHAN PICTON DAVIES – LLYWYDD CENEDLAETHOL 2025 - 2027

Oherwydd amgylchiadau niferus iawn yn fy nheulu rwyf wedi dewis yr elusen “Ymchwil Canser Cymru”, ac yn benodol Canser y Fron. Yn ystod y ddwy flynedd nesaf rwy’n gobeithio gwnewch chi ymuno gyda fi a chefnogi mewn unrhyw ffyrdd y dymunwch, yn aelodau, canghennau, clybiau a rhanbarthau!

Elusen Canser y Fron Cymru - Gobaith, Gofal, a Newid

Mae canser yn effeithio ar bob un ohonom mewn rhyw ffordd - p’un ai’n bersonol neu drwy anwyliaid. Yn anffodus, mae’r ystadegau’n dangos bod “un mewn dau” yng Nghymru’n debygol o gael diagnosis o ganser ryw dro yn eu bywyd. Mae hyn yn realiti trawmatig, ond drwy weithredu gyda’n gilydd, gallwn wneud gwahaniaeth enfawr.

Yn ystod fy llywyddiaeth byddaf yn canolbwyntio ar waith hanfodol Elusen Ymchwil Canser Cymru a Canser y Fron, elusen sy’n ymroddedig i godi ymwybyddiaeth, cefnogi ymchwil, a chynnig cymorth uniongyrchol i fenywod ledled y wlad sy’n cael eu heffeithio gan y clefyd.

I wneud fy ymgyrch yn un llwyddiannus dwi’n gofyn yn garedig am eich cymorth a chefnogaeth. Mae gen i sawl gweithgaredd a fydd yn dibynnu ar eich cydweithrediad. Yn ystod y flwyddyn gyntaf o fy llywyddiaeth, gofynnaf i’ch canghennau/clybiau i drefnu gweithgaredd i godi arian. (Plis peidiwch a bancio’r arian yma yn eich cyfrif, bydd angen trosglwyddo’r arian yma fel arian parod i’r Swyddfa yn Aberystwyth).  Yn ystod yr ail flwyddyn fe fydd Merched y Wawr yn dathlu’r 60fed, gofynnaf yn garedig i bob rhanbarth trefnu digwyddiad i godi arian.  Peidiwch boeni mae gen i restr hir o syniadau a fydd yn gallu fod o gymorth. 

Dwi am beintio’r Byd yn Binc….sef lliw Canser y Fron! Dyma le fydd nwyddau newydd ar werth….gan gynnwys ambell ddilledyn pinc!!

Mae cymaint o fenywod ledled Cymru yn wynebu canser y fron bob blwyddyn. Mae’n rhaid i ni wneud mwy na theimlo trugaredd - mae’n rhaid i ni barhau i weithredu. Drwy gefnogi Ymchwil Canser Cymru a Chanser y Fron, rydych chi’n buddsoddi mewn “gobaith, gofal, a gwellhad” i fenywod Cymru.

Mae pob rhodd, pob digwyddiad, a phob eiliad o’ch amser yn cyfrannu’n uniongyrchol at wella bywydau. Gyda’n gilydd, gallwn sicrhau nad yw neb yn wynebu canser a chanser y fron ar eu pen eu hunain.

Dewch i Ni Wneud Gwahaniaeth

Un o lysgenhadon yr elusen - merch sydd yn gyfarwydd i ni gyd, y gyflwynwraig, yr amryddawn Mari Grug.....ond i fi, mae hi’n un o fy nithoedd sbesial ac arbennig iawn.

Prosiect i’r Rhanbarthau:

I gyd fynd gyda’r Prosiect hoffwn gymryd y cyfle yma i ofyn am gydweithrediad pob rhanbarth. Mae’n neis gwneud rhywbeth ‘gwahanol’ ond yw e?  Dwi am i chi fy helpu i greu adnodd a fydd yn ddefnyddiol i bobl Cymru gyfan am fwy na chyfnod fy llywyddiaeth.

Gyda chymorth gwasg Carreg Gwalch, dwi am gyhoeddi llyfryn!  Ond dim llyfr arferol!  Fydd yr adnodd yma yn cynnwys gwybodaeth ddiddorol, addysgol, ac yn llawn ffeithiau amrywiol am eich rhanbarthau. Chi fydd yn cyfrannu cynnwys y llyfr!!

Fydd y llyfryn yn adlewyrchiad o ranbarthau MyW Cymru ac yn adnodd am flynyddoedd i ddod ar gyfer aelodau o’r mudiad (a phobl sydd ddim yn aelodau) profi cyfoeth ein gwlad.  Hoffwn i bob rhanbarth rhestri:

· Lle diddorol i ymweld ag e’

· Taith gerdded

· Chwedl neu hanes lleol neu gastell nodedig

· Rysáit o’r rhanbarth

· Geiriau o dafodiaith

· Ac wrth gwrs digon o luniau a ffeithiau diddorol i gadw diddordeb.  Dim byd yn y cynnwys all ddyddio neu fusnesau all gau.

Llyfryn yw hwn i’w ddefnyddio yn flynyddol wrth ymweld â’r Eisteddfod Genedlaethol neu wyliau teuluol.  Fydd cyfnod olaf fy llywyddiaeth yn gychwyn ar ddathlu chwedeg o flynyddoedd ein mudiad.  Ac wrth gwrs beth sydd yn well na nwyddau newydd i ddathlu a….fi’n credu fod e’n saff i fi ddweud bydd ddim bag y tro yma!!  Un o’r nwyddau hoffwn gael fydd crysau Polo ac wrth gwrs mewn lliw pinc…gyda brawddeg neu ymadrodd pwrpasol, …..cystadleuaeth falle!

Ar gyfer y flwyddyn gyntaf o fy llywyddiaeth, (fel nes i son yn gynt) gofynnaf yn garedig i bob cangen/clwb i drefnu digwyddiad mawr neu fach does dim gwahaniaeth, i godi arian……ac yn fy ail flwyddyn byddai digwyddiad rhanbarthol yn gyfle i dynnu pawb at ei gilydd. (Plis peidiwch a bancio’r arian yma yn eich cyfrif, bydd angen trosglwyddo’r arian yma fel arian parod i’r Swyddfa yn Aberystwyth). 

Fel mae rhai ohonoch chi’n gwybod dwi’n hoff o gerdded a’r bwriad fydd gwneud teithiau cerdded noddedig yn debyg i'r (Walk for Life) neu beth am “MoonWalk” (mewn bras lliwgar) o amgylch Aberystwyth!  Dewch gyda fi, bydde’r cwmni yn lyfli!

….a gyda hynny o eiriau (am nawr) hoffwn am y ddwy flynedd nesaf gyda’ch cymorth chi creu agwedd o…. .”Bositifrwydd mewn Pinc”.

PROSIECT GEUNOR ROBERTS – LLYWYDD CENEDLAETHOL 2023 - 2025 

PROSIECT JILL LEWIS - LLYWYDD CENEDLAETHOL 2021-2023

Cerdded, Cerdd a Chynefin

Rydym yn gyffro i gyd - mae gennym gyhoeddiad i wneud am brosiect ein Llywydd Cenedlaethol Jill Lewis...

Cafodd Jill ei geni a’i magu ym Mynachlogddu yn Sir Benfro ac mae Jill yn caru cefn gwlad ac yn hoff iawn o gerdded yn ei milltir sgwar a thu hwnt.  Felly mae y prosiect yn seiliedig ar y thema    “Cerdded, Cerdd a Chynefin”.

Dywedodd Jill “Gan fod cynifer ohonom wedi cael tipyn o flas ar gerdded dros gyfnod y pandemig ac wedi teimlo ei fod wedi bod o les i’n Iechyd corfforol a meddyliol, - meddyliais y byddai’n braf i barhau a’r cerdded ac i wneud hynny yng nghwmni aelodau Merched y Wawr, darpar aelodau a dysgwyr o fewn pob rhanbarth yng Nghymru.”

Bwriad Jill yw ymweld a phob rhanbarth yn ystod y Llywyddiaeth a mynd ‘Am Dro’ a honno yn ‘wac’ hamddenol a rhwydd. Fel y dywed “Y gwmnïaeth fydd yn bwysig a dod i adnabod yr aelodau ar draws Cymru gan fwynhau y golygfeydd a dod i adnabod yr ardal yn well.” 

Fel rhan o’r prosiect byddwn yn chwilio am gerddi addas i gyd-fynd a’r daith ac efallai y bydd rhai yn cael yr awen i greu wrth gerdded, does dim rhaid iddo fod yn soned swmpus na chywydd nac englyn, pennill neu ddau cystal a dim!

O ran ‘cynefin’ yna braf fyddai nodi enwau’r blodau ac adar o fewn ein cynefinoedd gan anfon llun os yn bosibl neu enw a disgrifiad er mwyn i ni gael eu defnyddio a’u trosglwyddo i eraill.

A dyma air pellach gan Jill am eu chynlluniau “Ar ôl y daith wedyn, braf fydd cael ymuno i gael dished neu baned, neu bicnic, gan estyn croeso i unrhyw aelodau neu gyfeillion na fu’n cerdded i ymuno â ni am sgwrs.  Efallai y dylid cynnwys un gair arall – Cerdded, Cerdd, Cynefin – Cacen?” Bydd hyn eto yn fodd o gefnogi ein diwydiant lletygarwch o fewn ein cymunedau ar draws Cymru a gobeithio blasu rhai o ddanteithion y fro. Ein gobaith mawr ydyw y byddwn oll yn dod i adnabod Cymru a’n cynefinoedd  yn well”.

Cadwch lygad allan am y dyddiadau o fewn eich ardal – a beth am ymuno ar y daith y gyda’r Llywydd.  Neu beth am fynd ati i grwydro eich cynefin gan nodi enwau y planhigion, coed ac adar a’i rhannu ar ein tudalen gweplyfr Cerdded, Cerdd a Chynefin

Neu fe fedrwch anfon unrhyw luniau, cerddi neu wybodaeth am eich teithiau neu’ch cynefin at angharad@merchedywawr.cymru neu ei bostio atom.

PROSIECTAU MEIRWEN LLOYD – LLYWYDD CENEDLAETHOL 2018 - 2023 

Prosiect 6000 

‘Diogelu’r blaned i blant ein plant, gyda’n gilydd fe wnawn wahaniaeth’ 

Byddwn yn cyd weithio gyda Cadw Cymru’n Daclus i gasglu 6000 o fagiau sbwriel! 

Mae cyfnod y casglu yn parhau hyd at 30ain o Dachwedd 2019. Rhowch wybod i ysgrifennydd eich cangen neu gysylltydd clwb y nifer o sachau sydd wedi eu casglu a byddwn yn gofyn am y cyfanswm cyn 22ain Tachwedd, cyn y Ffair Aeaf yn Llanelwedd 2019. Gofynnir i chi waredu’r sbwriel/bagiau ailgylchu yn y Ganolfan Ailgylchu neu gyda’r casgliad sy’n dod o amgylch eich tai. 

Dyma ychydig o nodiadau gan Meirwen ar gyfer y rhai sydd yn casglu: 

• Fy ngobaith i fel Llywydd yw casglu 6000 o fagiau ar draws ein Rhanbarthau sef bag ar gyfer pob aelod.
• Dwi’n gobeithio ymweld â phob rhanbarth yn ystod y ddau ddigwyddiad yma a drefnir gan Cadwch Gymru’n Daclus i fod yn rhan o’r casglu: 

1. Glanhau’r Gwanwyn: 22 Mawrth 2019 – 21 Ebrill 2019 
2. Glanhau’r Traethau: Medi 2019 

Gofynnir i aelodau sydd yn gallu cynorthwyo yn y prosiect i

• Fynd fesul dwy, tair neu bedair i ysgafnu’r gwaith (un i gasglu deunyddiau ailgylchu e.e. caniau neu blastig ag un i gasglu sbwriel) 
• Weithio o fewn canllawiau perthnasol Cadwch Gymru’n Daclus 
• Beidio codi eitemau amheus neu beryglus e.e. chwistrelliadau – dyma’r rhif i gysylltu – 0808 808 2276 (drugslitterline.org.uk) lle cewch siarad ag aelod o staff profiadol 
• Fod yn ofalus a doeth wrth gasglu (dim ger y draffordd na ffyrdd heb balmant) 
• Ddefnyddio’r offer cywir: 
• Gwasgod felen lachar 
• Menig pwrpasol cryf i arbed eich dwylo 
• Picwarch fechan neu gasglwr coes hir 
• Bagiau i ddal yr holl gasgliadau (hyn yn ddibynnol ar ganllawiau ailgylchu awdurdodau lleol eich Rhanbarth) 

Pob hwyl gyda’r casglu

PROSIECTAU MERYL DAVIES – LLYWYDD CENEDLAETHOL 2014-2016 

Dyma’n nôd, yn syml ddigon – 
“Ategolion at y Galon” 
Mwclis, sgarffie, 
Broits a beltie, 
Cliriwch ddrorie, – Rhowch yn Rhadlon. 
Gaynor Roberts, Cangen Mawddwy

Bydd CALON a’r lythyren C yn bwysig dros y ddwy flynedd nesaf gan fod Meryl Davies, Llywydd Cenedlaethol wedi dewis cefnogi Sefydliad y Galon Cymru yn ystod ei Llywyddiaeth. Mae Sefydliad y Galon yn weithgar iawn yn ariannu ymchwil nyrsys arbenigol, yn ariannu diffibrilwyr lle mae’r angen, ac yn cynhyrchu pamffledi gwybodaeth ddwyieithog. 

• Codi ymwybyddiaeth o beryglon clefyd y galon, yn enwedig ymysg merched 
• Gofyn i bob cangen gynnal o leia’ un noson o hyfforddiant cymorth cyntaf a sgiliau achub bywyd 
• Holi yn eich ardal ble mae yna ddiffib yn barod, cofnodi’r lleoliad a chasglu’r wybodaeth fesul rhanbarth 
• I godi arian at yr elusen byddwn yn casglu Ategolion at y Galon a chesglir cyfareddwyr, menig, sgarffiau, beltiau a gemwaith. Derbynnir gleiniau (beads) ac unrhyw emwaith hefyd sydd wedi torri. Gofynnwn yn garedig i chi ddod â’r eitemau wedi eu didoli’n barod h.y. gemwaith mewn un bag a sgarffiau mewn bag arall a.y.b. Os yw’r gemwaith yn fach iawn dylid eu rhoi mewn bagiau unigol os gwelwch yn dda. Mae llawer iawn o eitemau wedi cyrraedd y Ganolfan yn barod, ac rwy’n siŵr fydd y prosiect yma eto’r un mor llwyddiannus â’r bagiau. 
• Annog y clybiau cerdded o wahanol ardaloedd i gysylltu â’i gilydd er mwyn dod i adnabod Cymru a’u cyd aelodau yn well. 
• Cydweithio gydag asiantaethau a darparwyr Iechyd a Gofal i godi ymwybyddiaeth o bwysigrwydd cyfathrebu drwy’r Gymraeg.

PROSIECTAU’R LLYWYDD 2012-2014 – GILL GRIFFITHS DRAMA, DYSGWYR A DAIONI

Thema Gill Griffiths, ein Llywydd Cenedlaethol yw ‘Drama, Dysgwyr a Daioni’. 

Rydym wedi cychwyn casglu bagiau ac fe lawnsiwyd yr ymgyrch yma yn y Penwythnos Preswyl yn Llanbedr Pont Steffan. Byddwn yn derbyn unrhyw fagiau, mewn unrhyw gyflwr. Ewch ati i edrych yn y cypyrddau ac fe fyddwn yn ddiolchgar iawn i chi. Byddant yn cael eu trosglwyddo i Gymorth Cristnogol sef elusen ein Llywydd am eleni. Bydd y rhai sydd wedi torri yn cael eu hailgylchu a’r rhai sydd mewn cyflwr da yn cael eu gwerthu ar stondin yn yr Eisteddfod Genedlaethol. 

Cystadleuaeth Ysgrifennu Drama fer ar y cyd rhwng Theatr Genedlaethol Cymru a Merched y Wawr a mewn cydweithrediad â’r Galeri a Chanolfan Mileniwm Cymru. Bydd gwobr o £300 i’r drama fuddugol a gobeithir ei pherfformio flwyddyn nesaf. 

Cynhelir cyrsiau sgriptio i aelodau Merched y Wawr ar 17 Tachwedd, un yng Nghanolfan y Mileniwm gyda Sera Moore Williams a’r llall yn y Galeri, Caernarfon gydag Aled Jones Williams. Cliciwch yma i ddarllen mwy …

Cliciwch yma i ddarllen rheolau’r gystadleuaeth a manylion y cyrsiau sgriptio … 

PROSIECTAU LLYWYDD 2010-2012 – MERERID JONES 

PROSIECT BLYCHAU ADAR 

Lansiwyd prosiect blychod adar Merched y Wawr gan Kelvin Jones, Swyddog Datblygu Ymddiriedolaeth Adareg Cymru yn ystod Penwythnos Preswyl Bwrlwm a Bantams Bangor. Cliciwch yma am ganllawiau BTO Cymru … 

Ffurflen i gofnodi hynt yr adar yn eich blychau nythu. Rhan o gynllun y BTO. 

CASGLU ALLWEDDI/AGORIADAU

ALLWEDD

Mae Merched y Wawr yn casglu allweddi/agoriadau i’w hailgylchu. 
Os oes gennych hen allweddi/agoriadau byddwn yn ddiolchgar iawn i’w derbyn.

AGORIADAU

Am fanylion pellach, cysylltwch â’r Ganolfan Genedlaethol ar 01970 611661 neu swyddfa@merchedywawr.com